Zyrtarët doganorë të Njësisë për Mobilitet në Vukovar kanë parandaluar kontrabandimin e 11 armëve automatike në pikën kufitare Tovarnik, në lindje të Kroacisë, afër kufirit me Serbinë.
Gjatë një kontrolli me rreze X të një kamioni për transport të automjeteve, më 31 maj 2025, u zbuluan struktura të dyshimta në njërën nga veturat e ngarkuara në mjet.
Pas kontrollit të detajuar, autoritetet doganore zbuluan 11 pushkë automatike dhe municion përkatës të fshehur në automjetin e dyshimtë.
Kamioni me targa të Kosovës po drejtohej nga një shtetas kosovar, i cili ishte në rrugë nga Republika e Kosovës drejt Zvicrës, duke transportuar disa automjete të përdorura.
Për shkak të dyshimeve për kryerjen e veprës penale të posedimit, prodhimit dhe furnizimit të paautorizuar me armë dhe lëndë plasëse, siç përshkruhet në nenin 331, paragrafi 3 të Kodit Penal të Kroacisë, Stacioni i Policisë Kufitare në Tovarnik do të paraqesë kallëzim penal ndaj shoferit dhe pasagjerit. /indexHR/
