Ashtu sikurse u bëmë me dije pak më herë, reperi i njohur Buta, është paraqitur sot para Gjykatës Themelore në Ferizaj, ku po përballet me akuza për shitblerje të substancave narkotike dhe armëmbajtje pa leje. Ai u arrestua më datë 11 shtator, ndërsa një ditë më pas, më datë 12 shtator, gjykata vendosi ndaj tij masën e paraburgimit.
Në seancën e sotme, Buta, emri i vërtetë i të cilit nuk është bërë publik zyrtarisht nga autoritetet, kërkoi lirimin nga paraburgimi, duke u bërë thirrje gjykatësve që të marrin parasysh rrethanat e tij familjare.
“Jam i vetmi mashkull në familje dhe kujdesem për nënën time 63-vjeçare, vajzën 1-vjeçare dhe gruan. Ato nuk mund t’i përmbushin nevojat e përditshme pa mua,” – u shpreh ai para trupit gjykues.
Rasti i reperit ka ngjallur vëmendje të madhe në opinionin publik dhe komunitetin artistik. Reperi tjetër i njohur, Gjiko, ka reaguar në mbështetje të kolegut të tij përmes një postimi në llogarinë e tij personale të Instagram-it , ku shkroi shkurt: “Free Buta.”
Seanca e radhës pritet të përcaktojë nëse paraburgimi do të zëvendësohet me një masë më të lehtë, apo nëse reperi Buta do të qëndrojë pas hekurave deri në përfundim të hetimeve.
