Mulla Osmani, hoxha i njohur nga Drenica, ka reaguar publikisht duke akuzuar institucione të shtetit dhe prokurorinë për shkelje dhe manipulime që, sipas tij, i kanë bërë vajzës së tij padrejtësi gjatë një procedure për punësim.
Osman Musliu ka publikuar dokumente dhe një reagim të gjatë, ku shpreh vendosmërinë se nuk do të ndalet dhe do t’i shfrytëzojë “të gjitha mjetet e mundshme” për të mbrojtur të drejtën e vajzës.
Sipas tij, vajza aplikoi në konkursin e hapur nga Ministria e Mbrojtjes për pozicionin e psikologes klinike, por dokumentet e saj “ishin fshehur” dhe më pas ajo u eliminua nga konkursi.
“Nëse drejtësia s’na dëgjon, do ta bëjmë të na dëgjojë!
E rrita. E edukova. Me mund e shkollova në Kosovë, Stamboll e në Amerikë. Vajzën.
Kaluam vite larg njëri-tjetrit. Ajo u shkollua, u avancua, u dallua. E në fund, në fund u kthye. Refuzoi karrierën në Amerikë për t’u kthyer në vendlindje — me shpresë, me vullnet, me kurajo.
Ndërsa sot, sot institucionet e shtetit dhe prokuroria po e shkelin me dy këmbët. Mua si prind, dhe atë si vajzë.
Aplikoi në konkursin e hapur nga Ministria e Mbrojtjes për psikologe klinike, ia fshehën dokumentet; pas reagimit tonë na thanë se kishin gabuar, por gjithsesi e eliminuan nga konkursi. Matrapazët. Në vend të saj punësuan dikë tjetër, pa të drejtë e pa licencë. Dallavergjinjët.
Shkelje e dallavere në aplikim për punësim. Shkelje e dallavere nga prokuroria. Më saktësisht, prokurori Besnik Jakupi dhe prokurori i shkallës së dytë Shkëlzen Ibrahimi.
Ia qajmë hallin mediave; bëhet intervista. Por, një dorë e errët e fort e panjohur intervenon disi dhe intervista nuk transmetohet.
E drejtësia hesht. Jo, edhe më keq — shtyp. Nëpërkëmb. Një vajzë me shumë përgatitje e me aq shumë dashuri për këtë vend.
Si duket disa duar janë fort të gjata e fort të errëta!
Por s’kemi ndërmend të dorëzohemi. Dallavergjitë e matrapazët s’mund të fshihen pas petkut të institucioneve. Dhe s’mund të na shkelin as të na heshtin.
Nuk kemi duruar. Dhe nuk durojmë. Qoftë edhe me të gjitha mjetet e mundshme; të gjitha mjetet e mundshme.” – thuhet në reagimin e Musliut.