Presidenti i SHBA-së, Donald Trump, do të zbulojë “Bordin e tij të ri të Paqes” në Davos të enjten dhe do të takohet me udhëheqësin ukrainas, duke përforcuar pretendimin e tij se është një paqebërës, vetëm një ditë pasi u tërhoq nga kërcënimet e tij kundër Groenlandës.
Trump njoftoi papritur të mërkurën se po tërhiqej nga tarifat ndaj Evropës dhe po përjashtonte veprimet ushtarake për të marrë Groenlandën nga Danimarka, duke lehtësuar pjesërisht një krizë që ka tronditur elitat globale.
Në ditën e dytë të qëndrimit të tij në resortin zviceran të skive, Trump do të kërkojë të promovojë “Bordin e Paqes”, organin e tij kontrovers për zgjidhjen e konflikteve ndërkombëtare, me një ceremoni nënshkrimi të kartës.
Bordi i sapoformuar ka një tarifë anëtarësimi të përhershme prej 1 miliard dollarësh dhe Trump ka ftuar udhëheqës, përfshirë Presidentin rus Vladimir Putin, Kryeministrin izraelit Benjamin Netanyahu dhe Kryeministrin hungarez Viktor Orbán, të bashkohen me të.
“Mendoj se ky është komiteti më i madh i krijuar ndonjëherë”, tha Trump të mërkurën gjatë një takimi me Presidentin egjiptian Abdel Fattah al-Sisi, një tjetër udhëheqës që pranoi të bashkohej.
Ngritja e komitetit vjen në një kohë frustrimi për Trumpin për shkak të dështimit të tij për të fituar Çmimin Nobel për Paqen, pavarësisht pretendimeve të tij kontraverse se i ka dhënë fund tetë konflikteve.
Edhe pse fillimisht ishte hartuar për të mbikëqyrur rindërtimin e Gazës pas luftës midis Hamasit dhe Izraelit, statuti i komitetit nuk e kufizon rolin e tij në atë territor, duke ngritur shqetësime se Trump dëshiron të krijojë një rival për Kombet e Bashkuara.
Aleatët kryesorë të SHBA-së, përfshirë Francën dhe Britaninë, kanë shprehur skepticizëm, por të tjerë janë bashkuar, veçanërisht në Lindjen e Mesme, ku Arabia Saudite dhe Katari, miqësorë ndaj Trumpit, kanë rënë dakord të marrin pjesë.
Rreth 35 udhëheqës botërorë kanë konfirmuar pjesëmarrjen deri më tani, nga rreth 50 ftesa që janë dërguar, tha të mërkurën një zyrtar i lartë i administratës Trump.
Trump tha gjithashtu se Putini kishte rënë dakord të bashkohej, megjithëse Kremlini ka thënë se ende po e shqyrton ftesën.