Shqiptimi i gjobave për thyerjen e rregullave në trafik bëhen shpeshherë shkas që shoferët të revoltohen dhe t’i pengojnë zyrtarët policorë. Përpos ofendimeve, ata eskalojnë edhe në kërcënime dhe sulme fizike, duke ua vështirësuar kryerjen e detyrave, raporton Gazeta Sinjali.
Burimet e Sinjalit kanë bërë me dije se një rast i tillë ka ndodhur të enjten në Prizren, ku Policia është përballur me një qytetar për shkak të parkimit të parregullt.
Zyrtarët policorë i kërkuan dokumentet shoferit, por ky i fundit u revoltua dhe u fut në sherr, duke i fyer e ofenduar.
Për ta vënë situatën nën kontroll, i dyshuari është arrestuar, por edhe gjatë prangosjes, Policia ka hasur në rezistencë, ku për pasojë disa policë kanë pësuar lëndime.
I dyshuari është shoqëruar në stacion policor për intervistim, ku para hetuesve ka dhënë deklaratën e tij lidhur me atë që ka ndodhur.
Pas përfundimit të procedurave policore, Prokurori i Shtetit ka urdhëruar inicimin e rastit ndaj tij për veprën “Sulm ndaj personit zyrtar”.
/GazetaSinjali/
