Gjuajtje me armë zjarri janë dëgjuar sot rreth orës 19:00, në rrugën “Mine Peza” në Prishtinë, me çrast një person mbeti i plagosur, raporton GazetaDemos.
Rastin për GazetënDemos e ka konfirmuar zëdhënësi i Policisë për rajonin e Prishtinës, Agron Borovci.
I plagosuri është dërguar për tretman mjekësor në QKUK, teksa siç njofton Policia, si rrjedhojë e hetimeve është identifikuar një person i dyshuar, dhe dy vetura që dyshohet se janë përfshirë në këtë rast.
”Rreth orës 19:00, është raportuar për shkrepje të armës së zjarrit në rrugën “Mine Peza” në Prishtinë.
Me të marrë informatën, policia ka dalë në vendin e ngjarjes dhe nga informacionet e para është bërë e ditur se një person është plagosur nga arma e zjarrit dhe se i njëjti është dërguar në QKUK për trajtimin e nevojshëm mjekësor.
Aktualisht policia ka identifikuar një të dyshuar të përfshirë në rastin në fjalë, po ashtu edhe dy vetura, ndërkaq po vazhdon punën e saj operativo-hetimore si dhe të ekzaminimit të vendngjarjes me qellim të sqarimit të plotë të rrethanave që karakterizojnë ngjarjen”, th ai për Demos.
