Leon Avdullahu, futbollisti i ri i Hoffenheim që debutoi dje në Bundesliga, është ftuar zyrtarisht nga Federata Shqiptare e Futbollit për ndeshjet e muajit shtator.
Trajneri i Kombëtares, Sylvinho, kishte zhvilluar një bisedë me lojtarin dhe familjen e tij rreth një muaj më parë, ndërsa së fundmi ka mbërritur edhe e-maili zyrtar në adresën e klubit gjerman, duke e bërë konkrete thirrjen kuqezi.
Për talentin premtues, interesim kanë treguar gjithashtu edhe Federata e Kosovës, ku vetë presidenti Agim Ademi e ka kontaktuar disa kohë më parë, si dhe Federata Zvicerane e Futbollit.
Avdullahu, që po shihet si një nga emrat më të ardhshëm të futbollit europian, tashmë duhet të marrë një vendim të rëndësishëm për të ardhmen e tij ndërkombëtare, ndërsa Shqipëria ka hedhur hapin e parë zyrtar për ta pasur pjesë të kuqezinjve.