Asociacioni i Gazetarëve të Kosovës ka dalë me reagim pas paralajmërimit për bojkotin e disa prej televizioneve kryesore në evnd nga ana e partisë në pushtet, Lëvizjes Vetëvendosje.
AGK ka shprehur shqetësim për këtë dhe i ka bërë thirrje VV’’së që ta rishqyrtojë pozicionin e saj dhe t’u ofrojë mediave qasje të barabartë në fushatë.
“Mediave duhet t’u mundësohet që në mënyrë të barabartë të paraqesin programet e të gjitha subjekteve politike që garojnë, pasi puna e tyre është në interes të publikut. Bojkoti i paralajmëruar paraqet goditje të qëllimshme ndaj pluralitetit medial që e shquan Kosovën dhe është vazhdimësi e një sërë veprimesh të kësaj qeverie dhe të Lëvizjes Vetëvendosje të drejtuara kundër gazetarëve dhe mediave në Kosovë”, thuhet në njoftim.
Nga AGK kanë dënuar edhe postimin e sotëm të zëdhënësit të VV’së, Arlind Manxhukës, i cili i ka cilësuar mediat si “institucione paralelel”, duke thënë se kjo gjuhë e rrezikshme dhe e papranueshme vështirëson klimën për ushtrimin e gazetarisë në Kosovë.
