Ngjarja e ndodhur një ditë më parë në Pirg të Korçës, ku një 14-vjeçar u vra me thikë nga bashkëmoshatari i tij pas një sherri mes tyre ka tronditur Shqipërinë, duke rikthyer në kujtesë të njëjtat dhimbje dhe trishtim që solli një tjetër ngjarje e trishtë e ndodhur disa muaj më parë në kryeqytet.
14-vjeçari E.Xh nuk do të të ulet më në bankat e shkollës në fillim të shtatorit, ëndrrat e tij u prenë në mes, pasi nuk mundi t’i mbijetonte plagëve të marra të shkaktuara nga thika e bashkëmoshatarit E.G.
Shkolla e Mesme e Bashkuar “Rexhep Tafili” në Pirg të Maliqit ka bërë një postim prekës në rrejete sociale, duke shprehur ngushëllime familjes së 14-vjeçarit E.Xh.
Postimi:
Sot zemrat tona janë më të rënda se kurrë. Humbëm jo thjesht një nxënës, por një djalë të mrekullueshëm, plot ëndrra, buzëqeshje dhe mirësjellje. Ti ishe shembull i përkushtimit, i dashurisë për dijen dhe i shpirtit të pastër.
Shkolla nuk do të jetë më e njëjta pa ty. Banka ku uleshe do të mbetet bosh, por kujtimet tona do të jenë gjithmonë plot me dritën që ti fale.
Fjalët nuk mjaftojnë për të shprehur dhimbjen, por ti do të mbetesh përjetësisht në zemrat tona.
Ti nuk u largove, por u bëre engjëlli më i bukur i Parajsës!
Ngjarja
Një ditë më parë E.Xh dhe E.G do të ndodheshin rastësisht në të njëjtin lokal në Pirg të Maliqit, ku më pas do të diskutonin mes tyre një sherr të nisur një vit më parë.
Por konflikti mes dy adoleshentëve përfundoi në tragjedi.
Në grindje e sipër E.G godet me thikë E.Xh, i cili transportohet në gjendje të rëndë në spital, por për shkak të plagëve të marra ndërroi jetë.
Po në spital përfundoi edhe autori i dyshuar i ngjarjes, i cili mori ndihmën mjekësorë pasi edhe ai ishte dëmtuar (jo me mjet prerës).
Ndërkohë ditën e sotme policia përveç disa adoleshentëve që ishin dje të pranishëm në vendngjarje, ka arrestuar edhe babain dhe xhaxhain e autorit të dyshuar, të cilët akuzohen se fshehën armën me të cilën u krye krimi.